Urdu Poetry

Advertisement

Sach Hain Hamiin Ko Aap Ke Shikave Bajaa Na The
Beshak Sitam Janaab Ke Sab Dostaanaa The

Haan Jo Jafaa Bhii Aap Ne Kii Qaayede Se Kii
Haan Ham Hii Kaaraaband-E-Usuul-E-Vafaa Na The

Aaye To Yuun To Ke Jaise Hameshaa Ke Meharabaan
Bhuule To Yuun Ke Goyaa Kabhii Aashanaa Na The

Kyon Daad-E-Gam Ham Ne Talab Kii, Buraa Kiyaa
Ham Se Jahaan Men Kushtaa-E-Gam Aur Kyaa Na The

Gar Fikr-E-Zakhm Kii To Khataavaar Hain Ke Ham
Kyon Mahv-E-Madh-E-Khuubii-E-Teg-E-Adaa Na The

Har Chaaraagar Ko Chaaraagarii Se Gurez Thaa
Varnaa Hamen Jo Dukh The Bahut Laadavaa Na The

Lab Par Hai Talkhi-E-May-E-Ayyaam Varnaa “Faiz”
Ham Talkhi-E-Kalaam Par Maa_Il Zaraa Na The

Advertisement

Sabhii Kuchh Hai Teraa Diyaa Huaa Sabhii Raahaten Sabhii Kalafaten
Kabhii Sohabaten Kabhii Furqaten Kabhii Duuriyaan Kabhii Qurbaten

Ye Sukhan Jo Ham Ne Raqam Kiye Ye Hain Sab Varaq Terii Yaad Ke
Ko_Ii Lamhaa Subah-E-Visaal Kaa, Ka_Ii Shaam-E-Hijr Kii Qurbaten

Jo Tumhaarii Maan Len Naasihaa To Rahegaa Daaman-E-Dil Men Kyaa
Na Kisii Uduu Kii Adaavaten Na Kisii Sanam Kii Muravvaten

Chalo Aao Tum Ko Dikhaayen Ham Jo Bachaa Hai Maqtal -E-Shahar Men
Ye Mazaar Ahal-E-Safaa Ke Hain Ye Hain Ahal-E-Sidq Kii Turbaten

Merii Jaan Aaj Kaa Gam Na Kar, Ke Naa Jaane Kaatib-E-Vaqt Ne
Kisii Apane Kal Men Bhii Bhuul Kar Kahiin Likh Rakhii Ho Masarraten

Advertisement

Raushan Kahiin Bahaar Ke Imkaan Huye To Hain
Gulashan Men Chaak Chand Garebaan Huye To Hain

Ab Bhii Khizaan Kaa Raaj Hai Lekin Kahiin Kahiin
Goshe Rah-E-Chaman Men Gazal-Khvaan Huye To Hain

Thaharii Huyii Hai Shab Kii Siyaahii Vahiin Magar
Kuchh Kuchh Sahar Ke Rang Par-Afshaan Huye To Hain

In Men Lahuu Jalaa Ho Hamaaraa Ke Jaan-O-Dil
Mahafil Men Kuchh Chiraag Farozaan Huye To Hain

Haan Kaj Karo Kulaah Ke Sab Kuchh Lutaa Ke Ham
Ab Be-Niyaaz-E-Gardish-E-Dauraan Huye To Hain

Ahal-E-Qafas Kii Subah-E-Chaman Men Khulegii Aankh
Baad-E-Sabaa Se Vadaa-E-Paimaan Huye To Hain

Hai Dasht Ab Abhii Dasht Magar Khuun-E-Paa Se “Faiz”
Sairaab Chand Khaar-E-Mugelaan Huye To Hain