Hamara Kya Hai..?

Advertisement

Hamara Kya Hai..?

Hamara Kya Hai Ke Ham Toh Chiraagh-E-Shab Ki Tarah
Agar Jalay Bhi To Bas Itni Roshani Ho Gi
Ke Jaisay Tund Andheron Ki Raah Mein Jugnoo
Zara Si Dair Ko Chamkay, Chamak Ke Kho Jaye
Phir Is Ke Baad Kisi Ko Na Kuch Sujhaaii De
Na Shab Katay Na Suraagh-E-Seher Dikhaaii De

Hamara Kya Hai Ke Ham To Pas-E-Ghubaar-E-Safar
Agar Chalay Bhi To Bas Itni Raah Tay Ho Gi
Ke Taiz Hawaa’on Ke Zard Maa’il Naqsh-E-Qadam
Zara Si Dair Ko Ubhray, Ubhar Ke Mit Jaye
Phir Us Ke Baad Na Raasta Na Rah-Guzar Milay
Had-E-Nigaah Talak Dasht-E-Bekinaar Milay

Hamari Simt Na Dekho Ke Koii Dair Mein Ham
Qabeela-E-Dil-O-Jaan Juda Honay Waalay Hein
Basay Basaaye Huye Sheher Apni Aankhon Ke
Misaal-E-Khaanaa-E-Veeraan Ujarnay Waalay Hein
Hawaa Ka Shor Ye Hi Hai To Dekhtay Rehna
Hamari Umer Ke Khaimein Ukharnay Waalay Hein

Kuch To Main Bhi Bohat Dil Ka Kamzor Hoon
Kuch Mohabbat Bhi Hai Fitratan Badgumaan.